JOP-IGO COMBO

“JOP-IGO Combo”-ak, Nafarroako musikari gazteak biltzen ditu, jazzari eta musika modernoari lotutako proposamen baten inguruan. Interpretazioa, inprobisazioa eta gaur egungo errepertorioa uztartzen ditu. Lehen emanaldia maiatzaren 9an, larunbata, 19:30etan izan zen Elizondoko Foruen Plazan. Bigarren kontzertua maiatzaren 10ean, igandea, 13:00etan izan zen, Plazara! gunean (Kale Nagusia, 31), Iruñean.

Satie & friends

Duela 100 urte baino gehiago hil zen Erik Satie konpositorea. Zaila da Satie definitzea, baina eragin handia izan zuen bere garaiko gainerako konpositoreengan. Bere lanik ezagunenetako bat Gymnopédies bilduma da: pianorako pieza labur, motel, gogoetatsu, lasai eta hausnartzaileak biltzen dituena. Horregatik, Satieren musika gaizki ulertua izan da maiz, introspektibotzat jo izan delarik. Aldiz, Satieren musikak sormenaren muga gainditu zien surrealismoari eta dadaismoari. Programa honen bidez, Satie ardatz nagusi hartuta, XX. mendearen lehen erdialdeko hainbat soinu eta ikuspegi estetiko erakutsi nahi ditugu, ez musikaren bidez soilik, baita kontakizuna eta antzezpenen bidez ere. Kezkagarria eta, aldi berean, dibertigarria izan daiteke John Cage-en 4’33” obra ulertzea. Baina, Malevichen kasuan bezala, Bigarren Mundu Gerraren ondoren, antirromantizismoak bultzatuta, artistaren egoaren behin betiko ezabaketa suposatu zuen. Bai Satie-ren, bai Cage-ren existentzialismoa umoreak markatzen du, eta biek galdetzen diote euren buruari non ote dagoen muga. Gaur egun ere, geure buruari egin diezaiokegu galdera bera. Arte “garaikidea” nola hautematen dugun zalantzan jartzen duen kontzertua da, mugimendua sortu eta mende batera oraindik ulerkaitza baita. Inor axolagabe utziko ez duen esperientzia dugu hau, publikoaren eta interpretearen arteko muga espaziala ezabatzea helburu duena. Narratzailea: Miguel Nuño Zuzendaria: Mirari Etxeberria Guerrero Itzulpenak: Amaia Orbe Barrio Kartela: Nahia Urretagoiena Kortadi

JOP | IGO in Blue

Programa Mirari Etxeberriak zuzenduko du, Maurice Ravelen Alborada del Gracioso lanarekin. Ondoren, XX. mendeko lanik enblematikoenetako bat entzungo dugu: George Gershwinen Rhapsody in Blue. Lan horretan, Jonathan Milla pianista bakarlari gonbidatua izango dugu. Kontzertuaren amaieran, sortu berria den IGO Big Band taldeak, big band-entzako berezko errepertorioaren aukeraketa bat interpretatuko du. Roman Degtariev zuzendari artistikoa izango delarik. 🎹 Bakarlari gonbidatua: Jonathan Milla 🎶 Zuzendariak: Mirari Etxeberria eta Roman Degtariev 🎺🎻Parte hartzen dute: Iruñeko Gazte Orkestrak eta IGO Big Band-ak

Ritmos Latinos

Musika klasikoaz gozatzen duten gazteak ikusi nahi al dituzu oholtzan? Gazte interprete kolonbiar eta nafarren eskutik Kolonbiako eta Latinoamerikako musika bizi nahi duzu? Etor zaitez Irunberriko Aibar, Peralta eta Artaxonako kontzertuetara, Iruñeko Gazte Orkestrak (IGO) uda honetan eskainiko ditu eta! Kontzertu guztiak doakoak dira, eta esperientzia zoragarri hau zuekin partekatzeko irrikitan gaude. Erritmo Latinoak Aibarren da Iruñeko Gazte Orkestrak (IGO) antolatutako hurrengo topaketa. Abuztuaren 25etik 31ra bitartean burutuko da, Bogotako Sinfonietta Academyrekin batera, Aibar haranean. Ibermúsicas programaren laguntzari esker, 2024ko abuztuan, IGOko hainbat kideek Kolonbiara bidaiatzeko eta Sinfonietta Academy-n parte hartzeko aukera izan zuten; IGOren antzeko orkestrarekin. Aurten, Iruñeko Gazte Orkestrak egingo ditu anfitrioi-lanak, eta azken mendeko errepertorio amerikarraren aukeraketa bat landuko dute bi taldeek elkarlanean. Errepertorio hori abuztuaren 29an eta 30ean interpretatuko dugu, 19:30etan, Peraltako Kultur Etxean eta Artaxonako Reyno Espazio Eszenikoan, Luis Felipe Calero (Bogotá) zuzendaria izango delarik. Gainera, abuztuaren 28an, osteguna, zenbait ganbera taldek kontzertua eskainiko dute 19:30etan Aibarko San Pedro elizan. Artean inguruko kaleak musikaz beteko dira. Egun hauetan zehar, gazte musikariei errepertorioa lantzen lagunduko dieten irakasle ospetsuak izango dira. Nafarroako Gazteriaren Institutuaren, 2025eko Aurrekontu Parte-hartzaileen laguntzari eta Nafarroako Gobernuko Kultura Ekintzako Zerbitzuaren lankidetzari esker.

Sinfonismo Monumental TE DEUM

FCNAEk Te Deum kontzertua antolatu du, Haydn-en (Hileta Sinfonia), Eslavaren eta Brucknerren hiru obra sinfoniko monumentalekin. Te Deum laudamus (Zuri, Jainko, gorazarre), esker oneko antzinako ereserki kristaua da, tradizioz San Anbrosiori eta San Agustini egotzia. Testu horrek Hilarión Eslava eta Anton Bruckner sakonki erakarri zituen, eta haien fede sakona eta jainkotasunaren ikuspegia musikaren bidez adierazteko aukera eman zien. Nafarroako Abesbatzen Federazioko Abesbatza Sinfonikoa 2008ko abenduan sortu zen, erkidegoko musika koral ez-profesionala nabarmentzeko helburuarekin, bai Nafarroan bertan, bai kanpoan. Abesbatza federatutako abesbatzetako kideek osatzen dute, Nafarroako aniztasun eta talentu korala islatzen duelarik. Musika korala adierazpide artistikoa da, eta garai berrietara egokitu eta berrasmatu egin da. Hala, berrikuntza eta Nafarroako kultur bizitzaren parte bihurtu da. FCNAE Abesbatza Sinfonikoa Iruñeko Gazte Orkestra (IGO) Sopranoa: Carolina Luquin Duarte Mezzosopranoa: Leticia Vergara Pérez Tenorea: Josu Cabrero Antolín Baxua: Hodei Yáñez Sorondo Zuzendaria: Jesús Mª Echeverría

Goiza Kontu Kontari

Iruñeko gazte orkestrak, bosgarren Gabonetako galan, Goiza kontu kontari emanaldira gonbidatzen du publikoa, Baluarten. Eta zein testuinguru hoberik ametsez eta fantasiaz beteriko kontzertu bat proposatzeko, Errege Magoak iritsi aurreko goiza baino? Bertan, Scheherezade misteriotsua, Ali Babaren berrogei lapurrak eta erraldoi bat ere izango ditugu lagun. Gainera, talentu gaztea sustatzeko asmoz, Jon Imanol Etxabe eta Imanol Resano abeslariak izango ditugu, baita Saudade abesbatza eta Saudade Musika eta Abesbatza Eskola, eta Atarrabiako Abesbatza ere. Horrez gain, Iñigo Casalí arituko da narratzaile. Atarrabiako Abesbatza, Saudade Abesbatza eta Saudade Musika eta Abesbatza Eskola Zuzendaria: Mirari Etxeberría Bakarlariak: Jon Imanol Etxabe (baritonoa) eta Imanol Resano (tenorea) Narratzailea: Iñigo Casalí Abesbatzen zuzendariak: Iñigo Casalí, Juan Gainza, Teresa Apesteguía eta Jonathan Milla

Printzesa Horia Opera

Printzesa Horia musika, tailerrak eta dibulgazioa uztartzen dituen astea da. Iruñeko Gazte Orkestra abuztuaren 3tik 10era izango da Baztanen, inguruko kultur eragileekin elkarlanean hainbat jarduera antolatuz eta herritarren parte-hartze aktiboan arreta jarriz. JARDUERAK Kalejira — Abuztuak 3 Elizondoko kaleetan zehar egingo dugu, plazan amaituko den musika-ibilbidea. Orkestrako metal-haizeen- eta perkusio-atala arduratuko dira kalejiraz, erraldoi batek ibilbidea plazako kioskoraino gidatuko duelarik. Bertan, errepertorioak jai-giroa hartuko du, eta edozein musika-emanaldi izango da ongietorria. Baztango Folklorea kontzertu-tailerra — Abuztuak 4 Kontzertu honen helburua Patxi eta Javier Larraldek Baztango folklorearen inguruan egindako ikerketa-lana balioan jartzea da. Asier Capónen moldaketei esker, musika hau interpretatuko dugu, Patxi Larraldek dantzak ikasteko beharrezko azalpenak emango dituelarik. Arizkunen egingo den tailer honetara jende guztia egongo da gonbidatuta. Elizgibela lorategiaren inaugurazioa — Abuztuak 5 Iruritako espazio publiko bat inauguratzeko plazera izango dugu, Iruritako txistulariekin elkarlanean, Jon Irazokiren eskutik. Kanpoan izango da, haraneko biztanleek inguruko ikuspegi ederrez gozatzeko aukera izan dezaten. Ganbera-musikako kontzertua — Abuztuak 6 Orkestrako musikari gazteek ganbera-musika kontzertua eskainiko dute. Talde txikiagotan banatuta, hainbat musika-formazio ezberdinentzako errepertorioa zuzenean ezagutzeko aukera eskainiz. Kontzertu pedagogikoa Erratzun — Abuztuak 7 Topaketa honetan adin guztietako publikoak parte har dezan, gazteei zuzendutako kontzertu pedagogikoa aurkeztuko dugu. Matxalen Erzilla pedagogoaren egile-lanean oinarritutako ipuin musikatu baten bidez, haurrak parte hartzera gonbidatuko ditugu Erratzun. Txokoto Tabernako kontzertua — Abuztuak 8 Kontzertu hau giro intimoagoan egingo da, Txokoto Tabernako goiko pisuko aretoan, ikuspegi paregabeekin. Musika-bidaia bat izango da hainbat talderen eskutik, tangoa lehen eskutik bizitzeko aukera izango dugularik. Piazzolla argentinar konpositorearen lanen bidez, antzerkiaren adierazkortasunaz gozatzeko aukera izango dugu, orkestrako perkusio-jotzaileen eskutik. Elizondoko Santiago elizako kontzertua — Abuztuak 9 Elizondoko elizan egingo den kontzertuan organoa izango da protagonista. Organoarekin batera orkestrarako ezohiko errepertorioa entzuteko aukera izango dugu, esperientzia akustiko berezi eta zirraragarria eskainiz. Camille Saint-Saënsen opera komikoa — Abuztuak 10 Musika egonaldi honi amaiera emateko, opera bat antzeztuko dugu Elizondoko pilotalekuan. Erabaki horren helburua, jarduerak hiriburutik deszentralizatzea eta publikoarengana hurbiltzea da, antzezpena gertutik gozatzeko aukera eskainiz. Gainera, obra euskarara itzulita aurkeztuko da, esperientzia eta ulermena errazteko.

JOP | IGO & Errioxako Abesbatza Sinfonikoa

Errioxako Abesbatza Sinfonikoa 2007an sortu zen, musika korala eta musika sinfonikoa, sustatu, ikertu eta zabaltzeko helburuarekin. Talde hau José Luis Barrio Bastida irakasleak zuzendu du sortu zenetik, eta gaur egun 84 abeslarik osatzen dute. Logroñotik, Errioxatik eta inguruko probintzietatik datoz, esperientzia zabala dute abeslariak. Hasieratik heldu die errepertorio askotariko eta konplexuari, a cappella nahiz orkestraren laguntzarekin. Horri esker, malgutasun musikal eta miresgarria garatu dutelalarik. Bere esperientziari esker, errepertorio zabala eskaintzen du Abesbatzak, eta, bai edukien kalitateagatik, bai interpretazio zainduagatik, harrera bikaina izan du publikoa eta erakunde antolatzaileen aldetik.

Emakume Konpositoreen Kontzertua

Emakumeen Nazioarteko Eguna dela eta, hitzaldi eta kontzertuak uztartzen dituen emanaldia proposatzen dugu. Horretarako, konpositore bakoitzari buruz aurkezpen labur bat egingo da, askotan baztertua edo ezezaguna izan den musika ezagutarazteko. Jarraian, konpositore horien hainbat obra interpretatuko dira. Aurkezpen eta musika emanaldien artean, konpositore horietako batekin mahai-ingurua partekatzeko ohorea izango dugu, eta ondoren, haren obra bat interpretatuko dugu. Azkenik, formatu hauen garratziari buruzko aldarrikapen laburra egingo da. Izan ere, gaur egun, konpositore horien obra zabala urteko egun gutxitara murrizten da. Halaber, lurraldeko orkestra ospetsuenen obra eta konpositoreen kanon zabalari buruz hitz egingo da.

Zirrarak

Aukeratutako errepertorioa adierazkorra eta iradokitzailea da. Horregatik, arte plastikoekin eta dantzarekin batera taularatzeko ezin hobea dela esango genuke. Horrela, espazio berean hainbat diziplina elkartzeak esperientzia borobilagoa bizitzeko aukera emango dio ikusleari. Claude Debussyren Prélude à l’après-midi d’un faune obra interpretatuko dugu, Stéphane Mallarméren poema batean inspiratutako poema sinfonikoa. Pierre Boulezen arabera, obra honek musika modernoaren hasiera markatu zuen, eta hainbat balletetarako inspirazio iturri izan da. Musikak proposatzen duen eszena udako arratsalde bero batean girotuta dago, ninfen bila korrika ibiltzeaz nekatuta, fauno baten esnatze nagia deskribatzen duela. Azkenean, landa erdian siesta egitea erabakitzen du. Ondoren, Darius Milhaud eta Germaine Tailleferre konpositoreen obrak ere entzungo ditugu. Biak Les Six taldeko kide izan ziren, sei konpositore frantsesez osatutako taldea. Ez zuten zertan estiloa partekatu, baina bai espazioa, garaia eta haien arteko harreman pertsonala. Milhaud-en La Création du Monde obra entzungo dugu. Karga programatiko handiko lana da, eta bertan sorkuntzaren aurreko kaosa, zuhaitzen ernamuina, animalien jaiotza, hainbat jainkok sorginkeria magikoak egitea eta gizon eta emakumearen jaiotza irudikatzen dira. Azken hauek dantzaren eta desiraren bidez, musu batean elkartu eta isolatuta geratzen dira, udaberria sortzen den bitartean. Tailleferre konpositore frantsesaren Petite Suite izango da hurrengo obra, haren zati handi bat ezezaguna izan daba ere. Lan labur honek melodia sorta bat dakarkigu, arin eta dotore garatzen diren mugimendu txikiez osatuta. Izaera herrikoia duten melodiak bata bestearen atzetik datoz, harmonia iradokitzaileek babestuta. Azkenik, Maurice Ravel-en Ma Mère l’oye lana aurkeztuko dugu. Ipuinetan oinarritutako musika da, hala nola Mutil txikia edo Loti ederra. Jatorriz lau eskutara dago idatzita, pianorako, gerorago orkestratu eta zabaldu bazuen ere, Parisko Grand Théâtre-n ballet formatuan estrenatu zelarik. BIRAREN DATAK: 2024/02/16: Oteiza Museoa (Nafarroa) 2024/02/17: Círculo Logroñés (Logroño, Errioxa) 2024/02/18: Cultural Caja de Burgos (Burgos, Gaztela eta Leon)

Ur Goiena, Ur Barrena

Kontzertu honetan, Nafarroako aintzinako ohitura bat, Bigarren Mundu Gerran galdutako balts bat, bombardino bakarlari bat eta paregabeko abesbatza bat aurkezten ditugu… Galduko al duzu!? Beste urte batez, Iruñeko Gazte Orkestrak ohiko Gabon-kontzertua eskainiko du, oraingoan Orfeoi Iruñarraren haur-abesbatzarekin batera. Baluarten egingo den emanaldirako aukeratutako errepertorioak Shostakovichen 2. Jazz Suite-tik hasi eta bombardino bakarlariak aurkeztuko duen fantasia zeltaraino hainbat obra biltzen ditu; tartean, Xabier Sarasola, Iñigo Casalí, Eva Ugalde eta Junkal Guerrero bezalako nafar eta euskal konpositoreen lanak entzungo direla. Kontzertu dibertigarria izango da, adin guztietarako, eta musikaren historia ikuspegi gazte eta arduragabetik kontatuko da.

Gabonetako Kontzertua

Iruñeko Gazte Orkestrak talde berria aurkeztuko du: IGO TXIKI! Big Band formatuan izango da, Sinatraren abestien eta beste hainbat piezaren moldaketa originalekin, hala nola Groovin’ Hard eta Chicken. Programa Disneyren abestiekin osatuko da, familiek Gabonetan gozatzeko plan ezin hobea da! 14 eta 18 urte bitarteko talentu gazteak ezagutzera gonbidatzen zaituztegu. Sarrera doan izango da, edukiera bete arte. Zuzendaria: Román Degtiarev Abeslariak: Daniel Amatriain, Fermín Ruiz, Paula Maldonado

UNX Jaialdia

Unx Jaialdia Nafarroako musika, ardo eta biziberritzearen lehen jaialdia da. San Martin Unx herriko hainbat guneetan egiten da, herriko ondare arkitektonikoari, upategiei eta ingurunearekiko errespetuari balioa emanez. Lehen edizio honetan, goizean zehar egin zen jardueran parte hartu zuen IGOk. Jarduera hori herrian zehar egindako bisita gidatuan oinarritu zen: hainbat gunetan geldialdiak egin ziren, eta entzunleek bertako ardoaz eta zuzeneko musikaz gozatzeko aukera izan zuten. IGOko perkusio jotzaileek emanaldi bat eskaini zuten San Martin Tourskoaren elizako atarian. Upategiko elementu ezberdinen soinuak aztertuz, ikusleek musikaren eta ardoaren arteko uztarketa esperimentatu ahal izan zuten. Iker Idoateren esku-hartzeek obra multzo honen entzuketan gidatu zuen publikoa. Interpreteak: Alejandro Carrascoso de la Cruz Inés Carlos Ejea Joan Marzal Sarrión Luis Ramos Güemes Proiektuko irakasleak: Aingeru Otxotorena Daniela Mozas Iker Idoate

Musikak Ukrainiarekin elkartzen gaitu

TE-4000 Musikala

Iruñeko Gazte Orkestrak beste urte batez Jaso Ikastolarekin elkarlanean jardun du autismoari buruzko urteko musikalean. - 2023/05/05 Barañaingo Auditorioan - 2023/10/11 Baluarte Auditorioan (Iruñea)

Musika Bihotzetik

Ez galdu "Musika bihotzez" kontzertua, Aurelio Sagaseta, Hilarión Eslava eta Felipe Gorritiren lanekin. FCNAEren Koru Sinfonikoak eta Iruñeko Gazte Orkestrak parte hartuko dute FCNAEk antolatutako Iruñeko Musika Sakroaren Jaialdian. Zuzendaria: Jesús Echeverría FCNAEren Koru Sinfonikoaren prestatzailea: Jordi Freixa Mezzosopranoa: Lucía Gómez Tenorea: José Luis Sola Baxua: Iñaki Fresán

Navidades en Casa | Gabonak Etxean

Eguberrietan, IGO etxean geratuko da! Gurekin ospatu nahi duzue? Kontzertu berezi honetan, gaur egun Iruñean eragin handiena duten taldeetako batzuekin arituko gara elkarlanean: Ibil Bedi, Burutik, Skabidean eta Nafarroako Jota Eskola. Orkestrarekin egin genituen lehen urratsetatik gaur egunera arteko bidaia izango da, Iruña hiriari eskerrak emateko, haien artean onartzeagatik. Horrez gain, jota eta Asier Capón, Jokin Zabalza eta Izaro Txapartegik sortutako moldaketa sinfonikoak uztartuko ditugu.

Anguianoko Ganbera Musika Jaialdia

Anguianoko Jaialdia diziplina anitzeko jaialdi berritzailea da, Errioxako landa ingurunean egiten dena. Aurten parte hartzera gonbidatu gaituzte, eta lehen aldiz partiturarik gabe jotzera ausartuko gara. Partiturarik, atrilik, aulkirik edota publikoa eta musikarien artean oztopo izan daitekeen bestelako objekturik gabeko taularatzea lortzeko. Alejandro Garrido, zuzendari eta biolin-jotzaileak, sormen prozesuan gidatuko gaitu, Dvorak-en Mundu Berria Sinfonia ospetsua antzezteko, pieza honen mugimendu energetikoak nabarmentzen dituen koreografia bat sortuz. Horrez gain, gure musikariek jaialdiak antolatutako hainbat tailerretan parte hartzeko aukera izango dute. Tailer horien bidez, herriko biztanleen eta hainbat diziplina artistikoren loturak sortuko dira, hala nola antzerkia, inprobisazioa eta dantzaren artekoak.

“La Princesse Jaune” Lanaren Grabaketa

"La Princesse Jaune", Camille Saint-Saënsen ekitaldi bakarreko opera komikoaren grabazioa, Juan eta Arantxa Urdániz neba-arrebek ekoitzitako film ertain baterako. Film ertainak istorioa jatorrizko testuinguru erromantikotik atera eta gure mundu globalizatuan kokatzen du, gazteen artean otaku mugimenduak arrakasta handia duen horretan. Grabazioa proiektuaren prestakuntza-faseko lehen urratsa da. Proiektuak laster izango du erabateko estreinaldia nazio mailan.

SUTAN Musikala

Jaso Musikala hainbat pertsonaren borondatezko lanari esker sortu zen, eta hala jarraitzen du gaur egun ere. Horrek balio bikoitza ematen dio musikalari. Alde batetik, zuzendaritza ikastolako irakasleek osatzen dute; bestetik, eszenatokian zein beste hainbat lanetan, emanaldi bakoitzean Bigarren Hezkuntzako 50 bat ikaslek parte hartzen dute, adin eta maila desberdinetakoak (DBHko lehen mailatik laugarrenera). Halaber, familien parte-hartzea ere azpimarratu nahi dugu, muntaketan, atrezzoa prestatzen eta beste hainbat zereginetan laguntzen baitute. Dagoeneko bederatzi ikuskizun egin ditugu, eta Euskal Herriko hainbat antzokitan eskaini ditugu emanaldi ugari. Baluarten eta Barañaingo Auditorioan aritu izan gara, baita Baionan, Donostiako Victoria Eugenia eta Kursaal antzokietan, Bilboko Arriaga antzokian eta Tuteran ere.

Miserere Handia

Hirurogeita hamarreko hamarkadaren hasieratik laurogeita hamarreko hamarkadaren erdialdera arte, Iruñeko Aste Santuko ospakizunetan, hiriko Udalak antolatzen zituen Kontzertu Sakroen barruan, tradizio bihurtu zen Katedralean Hilarión Eslava jaunaren “Miserere” obra interpretatzea. Garrantzi handiko ekitaldia bihurtu zen urte haietan. Kontzertua egiten zen bakoitzean hainbestekoa zen publikoaren joan-etorria, ezen leku guztietan pilatzen baitzen, leku bitxienetan ere. Batzuetan, entzuleen artean, obraren zenbait pasarte xuxurlatzen ere entzuten ziren, hainbeste urtez entzun ondoren buruz ikasi baitzituzten. Hiriko ondare immaterial apartu hori mantentzea da FCNAEren helburu nagusietako bat. Horregatik, Nafarroako Abesbatzen Federazioak, Nafarroako konpositoreen obrak berreskuratu eta zabaltzeko duen konpromisoaren barruan, tradizio hau hiritar guztiei eskaintzea erabaki zuen, Iruñeko Gazte Orkestrarekin batera. Nafarroako Abesbatzen Federazioaren Abesbatza Iruñeko Gazte Orkestra – Joven Orquesta de Pamplona Orkestraren zuzendaria: Jesús Echeverría Sopranoa: Cristina Sevillano Mezzosopranoa: Lucía Gómez Tenorea: José Luis Sola Baxua: Iñaki Fresán Abesbatzaren zuzendaria: Jordi Freixa

Nagusitan musikaria izan nahi dut

Iruñeko Gazte Orkestra Gayarre Antzokira itzuliko da, musika ezagutzen ari den haur baten begietatik egindako bidaian oinarritutako errepertorio zorrotz batekin. Bidean, hainbat obra eta bakarlari ezagutuko ditugu. Kontzertuak helburu pedagogikoa du, ez haurrentzat soilik, helduentzat ere. Horrela, familian gozatzeko esperientzia ezin hobea bihur daiteke. Orkestrak bere plantilla osoa izango du Dvořák, Shostakovich, Grieg eta Borodin konpositoreen obrak interpretatzeko. Gainera, Nafarroako artistekin ere arituko da elkarlanean, hala nola Saioa Goñi sopranoarekin eta Álvaro Blasco baritonoarekin. Kontzertua aukera ederra izango da Nafarroako talentu gazteaz gozatzeko eta musika klasikoa ikuspegi dibertigarri eta atsegin batetik ezagutzeko.

Oparia zuretzat

Munduari bira 60 minututan

Munduari bira 60 minututan

Munduari bira 60 minututan

Ametsen Fabrika

Bizirauleen Musika

Jupiterretik Lurrera

Proiektu honen helburua orkestraren soinu berriak esploratzea da, eta, aldi berean, ikusleek eszenatokian ez ezik inguruan ere gertatzen denaren parte senti daitezen, esperientzia berriak aurkeztea. Ikuskizuna Gustav Holst konpositorearen Jupiter, Alaitasunaren ekarlea lanarekin hasiko da. 1914 eta 1916 artean konposatu zen, eta Planetak izeneko obra handia osatzen duten piezetako bat da, pieza energetikoa, berritzailea eta deigarria. Haren bidez ikusleen arreta bereganatu nahi dugu hasieratik. Ondoren, Venus, Bakearen ekarlea dator. Jupiter ez bezala, obra lasaia da, disonantziak ebatzi eta tentsioekin amaitzen dena. Lan ausarta da, eduki emozional eta musikal handikoa. Emanaldia unibertsoan girotutako eszenografiaz lagunduta egongo da, ikusleak atmosferan erabat integratuta senti daitezen. Jarraian, bi konposaketa garaikideak aurkeztuko dira: Adore eta Finale, Carlos Hof konpositore espainiarrarenak. Bi obra hauek kontzertuaren erdigunean aurkeztuko dira, entzunleek nahi duten irudikapen abstraktuak baitira: maitasuna, agurra… Hitzez adierazteko gai ez garen hori Jupiter lana eta kontzertu amaieraren arteko tartean islatuko da. Carlo Hof-en bi obrak dantza garaikidearekin batera interpretatuko dira, Iruñeko La Faktoria dantza-eskolarekin. Amaitzeko, Charles Ivesen Erantzunik gabeko galdera obra izango dugu. Lan ausarta da, agian gaizki ulertua, gizakiak bizitzaren zentzuari buruz betiko galderak adierazten saiatzen dena: nora goaz, nondik gatoz eta zergatarako bizi gara… Bidaia, unibertsoan hasi eta gure barnean amaituko dugu, erantzunik gabeko galdera batekin.

Film Orkestra bat

Film Orkestra bat

Film Orkestra bat